Neft İxrac edən Ölkələr Təşkilatına (OPEC) üzv və qeyri-üzv ölkələrin nazirlərinin onlayn formatda keçirilən 34-cü iclasında 2022-ci ilin oktyabrında qəbul edilmiş qərarın qüvvədə saxlanılmasına Azərbaycan da razılıq verib.
Bu barədə Globalinfo.az-a Azərbaycan Energetika Nazirliyindən məlumat verilib.
Beləliklə, “Əməkdaşlıq Bəyannaməsi”nin iştirakçı ölkələrinin cari ilin avqust ayındakı kvotalarına nəzərən müəyyənləşdirilmiş öhdəlikləri sabit saxlanılır. Azərbaycanın da ixtisarlarla bağlı öhdəliyi gündəlik 33 min barrel, gündəlik xam neft hasilatı üzrə kvotası isə 684 min barrel həcmində olmaqla dəyişməz qalır.
“OPEC plus” ölkələri nazirlərinin növbəti görüşünün gələn ilin 4 iyun tarixində keçirilməsi razılaşdırılıb.
***17:40
OPEC+ Monitorinq Komitəsinin üzvü olan Rusiya, Səudiyyə Ərəbistanı, Birləşmiş Ərəb Əmirlikləri, İraq, Küveyt, Əlcəzair, Venesuela və Qazaxıstan neft hasilatı üzrə cari planın saxlanmasını tövsiyə ediblər.
Globalinfo.az xəbər verir ki, bu barədə OPEC+ nazirlərinin genişmiqyaslı görüşündə bildirilib.
Nazirlər növbəti görüşü fevralın 1-də keçirmək qərarına gəliblər.
