Bu gün Cənubi Qafqazda sülh heç vaxt olmadığı qədər yaxındır. Bu baxımdan sülhə qarşı atılacaq bütün addımların məsuliyyəti ABŞ-ın üzərinə düşür.
Globalinfo.az xəbər verir ki, bunu Milli Məclisin deputatı Elman Nəsirov parlamentin bu gün keçirilən plenar iclasında deyib.
O qeyd edib ki, ABŞ-ın dövlət katibi Entoni Blinken və Avropa Komissiyasının Prezidenti Ursula Fon der Lyayenin Azərbaycan Prezidenti İlham Əliyevə zəng edərək bu gün Brüsseldə keçiriləcək üçtərəfli görüş barədə məlumat vermələri yüksək qiymətləndirilməlidir: “Bu, Prezident İlham Əliyevin dünyadakı nüfuzundan xəbər verir.
ABŞ və Avropa İttifaqı rəsmiləri bildirib ki, bu görüşdə sadəcə iqtisadi məsələlər müzakirə ediləcək. Lakin gedişat onu göstərir ki, burada Azərbaycanın rəyi nəzərə alınmadan bəzi məsələlərin müzakirəsi gündəmə gələ bilər”.
Qeyd edək ki, bu gün Brüsseldə Ermənistanın baş naziri Nikol Paşinyan, ABŞ-ın dövlət katibi Entoni Blinken və Avropa Komissiyasının Prezidenti Ursula Fon der Lyaye arasında üçtərəfli görüş keçiriləcək.
Milli Məclisin Regional məsələlər komitəsinin sədri Siyavuş Novruzov deyib ki, bu gün Brüsseldə keçirilən görüşlə bağlı Azərbaycanın mövqeyi məlumdur.
“Burada məni narahat edən digər məsələ isə İranın susqunluğudur. 44 günlük müharibə zamanı İran hər gün bəyanat verirdi ki, Zəngəzura girmək olmaz. Amma bu gün görürük ki, İran bu məsələyə heç bir münasibət bildirmir. Bu gün həmin torpaqlarda NATO-nun, digər ölkənin kəşfiyyatçıları, eyni zamanda terrorçular var. İran bilməlidir ki, o torpaqlara yığılan silahlar Azərbaycan üçün yox, İran üçündür. Digər tərəfdən İran parlamentində bir deputat deyib ki, Azərbaycandakı İsrail səfirliyinə hücum edək. Elə gözünüz Azərbaycanı görür. Əgər gücünüz çatırsa, Amerikada, Rusiyada və digər ölkələrdəki səfirlikləri hədələyin”, – o söyləyib.
Milli Məclis sədrinin müavini Fəzail İbrahimli Azərbaycanın öz ərazilərini işğaldan azad etdiyini söyləyib və Bakının indi sülh istədiyini bildirib.
Fəzail İbrahimli deyib ki, belə olan halda Avropanın regionda müharibəni yenidən alovlandırmaq cəhdi qəbuledilməzdir:
“Bu cəhdlər nəylə əlaqədardır?! Cavab çox bəsitdir. Rusiya üçün ikinci cəbhə açmaq. Ukraynada baş verənlər, Rusiyaya tətbiq edilən sanksiyalar bir nəticə vermədi. İndi isə Ermənistan üzərindən həmin oynanmağa çalışılır. Ermənistan Rusiya tərəfindən yaradılan bir dövlətdir. Onlar burada ikinci cəbhəni açıb Ermənistanı Moskvanın əlindən almaq istəyidir. Lakin bütün bunlara baxmayaraq hesab edirəm ki, 5 aprel görüşünün heç bir nəticəsi olmayacaq”.
