Naməlum şəxs tərəfindən azyaşlının təqib edilməsilə bağlı yayılan görüntülər araşdırılıb.
Daxili İşlər Nazirliyinin (DİN) Mətbuat Xidmətinin əməkdaşı polis baş leytenantı İbrahim Əmiraslanlı Oxu.az-a açıqlamasında bildirib ki, polis əməkdaşlarının keçirdikləri tədbirlərlə həmin şəxs – 14 yaşlı yeniyetmə müəyyən olunaraq saxlanılıb.
***
Bakıda uşaq oğrusunun peyda olduğu iddia edilir.
Globalinfo.az bildirir ki, bu barədə məlumat baku.vs-in “qaynar xətti”nə daxil olub.
Bildirilib ki, hadisə Sabunçu rayonu, Yeni Ramana qəsəbəsində, məscidin yaxınlığında qeydə alınıb.
İddialara görə, bir nəfər maskalı şəxs küçədə oynayan uşağı qaçırmağa cəhd göstərib. Lakin ətrafdakıların müdaxiləsindən sonra hadisənin qarşısı alınıb.
Şikayətçi bildirir ki, zərərçəkmiş uşağın ailəsi polisə məlumat verib.
Məsələ barədə Daxili İşlər Nazirliyinə (DİN) müraciət etdik.
DİN-in Mətbuat Xidmətinin əməkdaşı polis baş leytenantı İbrahim Əmiraslanlı bildirdi ki, vətəndaş K.Seyidov polisə müraciət edərək ötən gün yetkinlik yaşına çatmayan övladının Sabunçu rayonu Ramana qəsəbəsi ərazisində naməlum şəxs tərəfindən təqib edildiyini bildirib.
Məsələ ilə bağlı ərazi üzrə Sabunçu RPİ-nin 12-ci PŞ-də araşdırmalara başlanılıb. Məsələ ilə bağlı əlavə məlumat veriləcək.
