“İsrail Fələstin məsələsinə yanaşmasını dəyişməlidir”.
Globalinfo.az xəbər verir ki, bu çağırışla Livan prezidentinin keçmiş müşaviri Amal Abu-Zeyd çıxış edib.
O, Qəzza zolağında vəziyyətin gərginləşməsinin İsrailin planlarını alt-üst etdiyini vurğulayıb:
“İsrail Fələstin məsələsinə münasibətini yenidən nəzərdən keçirməli və bölgəyə sülh gətirmək üçün təşəbbüs göstərməlidir. Çünki Qəzza zolağında vəziyyətin gərginləşməsi ərəb ölkələri ilə ticarət sazişi bağlamağı planlaşdıran İsrailin planlarını alt-üst edib. Hərçənd Ərəb-İsrail münaqişəsinin həlli regionda sülhün bərqərar olması üçün kifayət edirdi. Üstəlik, təcrübə İsrailin səhv addım atdığını sübuta yetirib. Ona görə də, Təl-Əviv öz yanaşmasını yenidən nəzərdən keçirməli və son nəticədə iki dövlətli həll yolunu qəbul etməlidir”.
Əbu-Zeydin sözlərinə görə, 1967-ci il sərhədləri daxilində Fələstin və İsrail münaqişəsinin həlli avropalılar üçün də zəruridir:
“Fələstin məsələsinin əhəmiyyətini anlamadan avropalıların Aralıq dənizində münasibətləri təmin etməsi mümkün deyil. Odur ki, mövcud münaqişə fələstinlilərin hüquqları tanınmayana qədər davam edəcək”.
Əliyar Xəlil
Globalinfo.az
