Azərbaycanla Ermənistan arasında münasibətlərin normallaşması üçün artıq çox işlər görülüb.
APA-nın Moskva müxbiri xəbər verir ki, bunu Rusiyanın xarici işlər naziri Sergey Lavrov erməni həmkarı Ararat Mirzoyanla Astanada MDB XİN başçıları Şurasının iclası çərçivəsində görüşündə bildirib.
“Biz əlbəttə ki, bu gün Azərbaycanla danışıqlarınızda işlərin necə getdiyini müzakirə etmək istəyirik. Bilirəm ki, bu yaxınlarda Avropada təmaslar olub, media müxtəlif şayiələr və fərziyyələrlə doludur. Əlbəttə ki, Rusiya, Ermənistan və Azərbaycan liderlərinin üçtərəfli bəyanatı mümkün qədər tez yerinə yetirmək üçün bu gün başqa nə etmək olar, onları nəzərdən keçirmək vacib olardı”, – Lavrov vurğulayıb.
O qeyd edib ki, Rusiya Federasiyasının yaxın qonşuları və dostları arasında münasibətlərin tam şəkildə normallaşması ölkənin maraqlarına tam cavab verir: “Biz bu prosesə öz töhfəmizi verməyə hazırıq”.
***
17:56
Rusiya üçtərəfli bəyanatların icrasına töhfə verməyə hazırdır.
APA-nın Moskva müxbirinin məlumatına görə, bunu Rusiya xarici işlər naziri Sergey Lavrov ermənistanlı həmkarı Ararat Mirzoyanla Astanada görüşü zamanı bildirib.
Rusiya XİN başçısı ölkəsinin üçtərəfli razılaşmaların tezliklə həyata keçirilməsi üçün nə edilməli olduğunu müzakirə etməyə hazır olduğunu da söyləyib.
Kollektiv Təhlükəsizlik Müqaviləsi Təşkilatının Ermənistana öz müşahidəçilərini göndərməyə hazır olduğunu qeyd edən Lavrov bildirib ki, bunun üçün Kollektiv Təhlükəsizlik Şurasının qərar verməsi lazımdır.
