“Söyüdlü kəndində sakinlərlə görüşdük. Yerində cavablandıra biləcəyimiz sualları cavablandırdıq. Narazılıq yaradan bütün məsələlər yoxlanılacaq və aydınlıq gətiriləcək”.
Globalinfo.az Azərtac-a istinadən xəbər verir ki, bunu Gədəbəy rayonunun Söyüdlü kəndində vəziyyətin araşdırılması üçün yaradılan komissiyanın sədri, ekologiya və təbii sərvətlər naziri Muxtar Babayev sakinlərlə görüşdən sonra jurnalistlərə açıqlamasında bildirib.
Komissiya sədri vurğulayıb ki, artıq kənddə bu istiqamətdə monitorinq işlərinə başlanılıb və nəticələri qısa müddətdə ictimaiyyətə açıqlanacaq.
Qeyd edək ki, ötən gün Baş nazir Əli Əsədovun sərəncamı ilə Gədəbəy rayonunun Söyüdlü kəndində tullantıxana sahəsində monitorinqlərin aparılması və mövcud vəziyyətin qiymətləndirilməsi məqsədilə komissiya yaradılıb. Ekologiya və təbii sərvətlər naziri Muxtar Babayev Komissiyanın sədri təyin edilib.
Komissiyaya Söyüdlüdə tullantıxana sahəsində monitorinqlər aparmaq və mövcud vəziyyəti qiymətləndirmək, sakinlərin sağlamlığının və ətraf mühitin qorunması sahəsində vətəndaşların müraciətlərini araşdırmaq, monitorinqin və qiymətləndirmənin nəticələrinə uyğun olaraq müvafiq təkliflər hazırlayaraq Nazirlər Kabinetinə təqdim etmək tapşırılıb.
***17:15
Gədəbəy rayonunun Söyüdlü kəndində vəziyyətin araşdırılması üçün yaradılan komissiyanın üzvləri kənd sakinləri ilə görüşdə aparılan monitorinqlər, görülən işlər barədə ilkin məlumat verib.
Globalinfo.az APA-ya istinadən bildirir ki, sakinlərin əsas tələbi iyunun 20-də aksiyaya cəhd zamanı saxlanılan kənd sakinlərinin azad edilməsi, ikinci gölün yaradılmaması, habelə müəssisədən birinci gölə zəhərli maddələrin axıdılması nəticəsində sakinlərin sağlamlığına və ətraf mühitə ziyan vurulmasının qarşısının alınması ilə bağlı olub.
Komissiyanın sədri Muxtar Babayev sakinlərə bildirib ki, ikinci gölün yaradılması nəzərdə tutulmur. O, mövcud istehsalat sahəsinin isə fəaliyyətinin araşdırılacağı, hər hansı zərər varsa, onu minimuma endirmək üçün tədbirlər görüləcəyini bildirib.
Bildirilib ki, yaradılan monitorinq qrupu kənd ərazisindəki müəssisənin fəaliyyətini araşdıracaq, ekologiyaya və ətraf mühitə təsiri müəyyən olunacaq, müəssisənin kənd əhalisinə qarşı sosial məsuliyyətinin artırılması istiqamətində addımlar atılacaq.
Qeyd olunub ki, həm süni gölün özündən, həm də ətrafında yerləşən təbii su mənbələrindən nümunələr götürüləcək. Kəndlilərin həyətyanı sahəsində məhsuldarlığın aşağı düşməsi şikayəti ilə bağlı torpaq nümunələri də analiz olunacaq.
Sakinlərin kənddə onkoloji xəstəliklərin artması barədə şikayətinə isə komissiyanın üzvü, səhiyyə nazirinin müavini ölkə üzrə və son 10 ildə Gədəbəy rayonu üzrə olan statistikanı təqdim edərək, ciddi nəzərə çarpacaq artım müşahidə olunmadığı qeyd edib.
Sakinlərin müəssisə tərəfindən havaya zəhərli maddələrin buraxıldığı barədə iddialarına cavab olaraq Ekologiya və Təbii Sərvətlər Nazirliyinin Geoloji Kəşfiyyat Agentliyinin İdarə Heyətinin sədri Əli Əliyev bildirib ki, sözügedən müəssisədə havaya hansısa tullantıların buraxılması ilə müşayiət olunan proses həyat keçirilmir.
Görüşdə o da vurğulanıb ki, aksiyaya cəhd zamanı saxlanan kənd sakinlərinin azad edilməsi üçün məsələyə baxılması ilə bağlı aidiyyəti qurumlara müraciət olunacaq.
Sonda Muxtar Babayev bildirib ki, aparılan monitorinqlərin nəticəsi olaraq hesabatlar hazırlanaraq Nazirlər Kabinetinə təqdim olunacaq, nəticə barədə ictimaiyyətə və kənd sakinlərinə məlumat veriləcək.
***16:00
Gədəbəy rayonunun Söyüdlü kəndində vəziyyətin araşdırılması üçün yaradılan komissiyanın üzvləri kənd sakinləri ilə görüşüb.
Globalinfo.az APA-ya istinadən xəbər verir ki, görüşdə ərazidə süni gölün tikintisi ilə bağlı yaranmış vəziyyət müzakirə olunub, komissiya üzvləri sakinlərin fikirlərini dinləyib.
***14:46
Gədəbəy rayonunun Söyüdlü kəndində vəziyyətin araşdırılması üçün yaradılan komissiyanın üzvləri kənd sakinləri ilə görüşür.
Globalinfo.az APA-ya istinadən xəbər verir ki, görüşdə ərazidə süni gölün tikintisi ilə bağlı yaranmış vəziyyət müzakirə olunur, komissiya üzvləri sakinlərin fikirlərini dinləyir.
Qeyd edək ki, iyunun 21-də Baş nazir Əli Əsədovun Sərəncamı ilə Gədəbəy rayonunun Söyüdlü kəndində tullantıxana sahəsində monitorinqlərin aparılması və mövcud vəziyyətin qiymətləndirilməsi məqsədilə yaradılan komissiyaya ekologiya və təbii sərvətlər naziri Muxtar Babayev rəhbərlik edir. Komissiyaya səhiyyə nazirinin, fövqəladə hallar nazirinin, kənd təsərrüfatı nazirinin müavinləri, Nazirlər Kabineti Aparatının Sənaye və energetika şöbəsinin müdiri, İqtisadiyyat Nazirliyi yanında Əmlak Məsələləri Dövlət Xidmətinin rəisi və Gədəbəy Rayon İcra Hakimiyyətinin başçısı daxildir.
Xatırladaq ki, Gədəbəy rayonunun Söyüdlü kəndində bir qrup şəxs kənd ərazisində süni gölün tikintisinə etiraz olaraq iyunun 20-də aksiya keçirməyə cəhd göstərib. Aksiyanın qarşısı alınan zaman polislə sakinlər arasında insident baş verib.
