İran Azərbaycana qarşı növbəti təxribata hazırlaşır.
Globalinfo.az xəbər verir ki, bu barədə məlumat Güney Azərbaycanla bağlı Teleqram kanallarında yayılıb.
Məlumata görə, SEPAH-ın bir qolu sayılan “Hüseyniyyun” qrupu Azərbaycan Respublikasının Təbrizdəki Konsulluğu qarşısında aksiya keçirmək niyyətindədir. Qruplaşma aksiya zamanı Azərbaycan diplomatlarının şəhəri tərk etmələrini tələb edəcək.
Qeyd edək ki, Bakının 4 İran diplomatını “arzuolunmaz şəxs” elan etməsindən sonra molla rejiminə yaxın ekspertlər Təbriz Konsulluğunun bağlanması tələbi ilə çıxış ediblər.
“Hüseyniyyun” qruplaşması SEPAH-ın Qüds briqadasının keçmiş komandanı Qasım Süleymani tərəfindən yaradılıb. Təşkilatın rəhbəri Tohid İbrahimbəylidir. Məhz bu təşkilat Azərbaycandan Suriyaya militan aparılması prosesinin təşkilatçısı olub.
İlkin Həsənov
Globalinfo.az
