ABŞ İran ərazisində katapult edən pilotun yerini taparaq onu xilas edib.
Globalinfo.az xəbər verir ki, bu barədə “The New York Times” (NYT) amerikalı rəsmilərə və hərbçilərə istinadən məlumat yayıb.
“İran ərazisində yaralı pilotun qarşısında iki əsas məqsəd var idi: gizlənmək və sağ qalmaq. O, hündürlüyü 7000 fut (2134 metr) olan dağ silsiləsinə qalxıb və orada yarğanın içində gizlənərək amerikalı hərbçilərin onu tapmasını gözləyib.
Bu vaxt ABŞ-ın Mərkəzi Komandanlığı qırıcı təyyarənin vurulduğu və pilotun xilas edildiyi barədə bəyanat hazırlayırdı.
Bəyanatın dərc olunmasından əvvəl — təyyarənin qəzaya uğramasından təxminən 14 saat sonra — ABŞ pilotun radio mayakı vasitəsilə ötürdüyü koordinatları əldə edib. Amerikalı pilotlara daim öz yerləşmə məlumatlarını ötürməmək və avadanlıqlardan məhdud istifadə etmək öyrədilir, çünki siqnal düşmən tərəfindən aşkar edilə bilər.
ABŞ Mərkəzi Komandanlığının nümayəndələri dərc olunmaq üzrə olan bəyanatı dərhal ləğv ediblər. Müdafiə naziri Pit Heqset ABŞ Prezidenti Donald Trampa zəng edərək bildirib ki, pilotu tapmaq ehtimalı olduğu müddətdə onun xilas edilməsi ilə bağlı məlumat məxfi saxlanılmalıdır.
Pilotun tək olduğuna əmin olduqdan sonra hərbçilər xilasetmə əməliyyatına başlamaq üçün qaranlığın düşməsini gözləyiblər. Xüsusi təyinatlı qüvvələrin döyüşçülərini daşıyan helikopterlər pilotun gizləndiyi uzaq dağlıq əraziyə doğru yola düşüb”, – deyə nəşr yazıb.
Qeyd edək ki, 3 apreldə İran ABŞ-a məxsus F-15 qırıcı təyyarəsini vurub və hər iki pilot İran İslam Respublikasının ərazisində katapult edərək təyyarəni tərk edib. Təyyarənin pilotu bir neçə saat ərzində xilas edilib, lakin onun ekipaj yoldaşı düşmən ərazisinin dərinliyində qalıb.
Əliyar Xəlil
Globalinfo.az
Həmçinin oxuyun
