Dünən İranda hökumət əleyhinə xalq kütlələrinin etiraz aksiyaları davam edib. Eyni zamanda, aksiyalarda iştirak etdiyinə görə həbs olunanlara ağır cəzalar verilməsi davam edir. Dünən məhkəmələr tərəfindən çıxarılmış ölüm hökmlərinin icrası istiqamətində növbəti addım atılıb.
Globalinfo.az-ın GunazTV-yə istinadən verdiyi məlumata görə, səhər saatlarında daha iki etirazçı barədə çıxarılmış edam hökmü icra olunub. Məhəmməd Mehdi Kərimi və Seyid Məhəmməd Hüseyni etiraz aksiyalarını yatıran BƏSİC üzvü Ruhullah Əcəminin qətlində təqsirli biliniblər. Bu iki etirazçı barədə edam hökmü yanvarın 3-də çıxarılıb.
“Mehr” xəbər agentliyinin yaydığı məlumatda bildirilir ki, dekabrda məhkəmənin etiraz aksiyasının iştirakçıları Məcidreza Rəhnavard və Möhsün Şekari barəsində edam hökmü də icra olunub.
Məlumata görə, yanvarın 6-da daha 4 nəfər barəsində edam hökmü çıxarılıb. Onlar “Allaha düşmənçilik” və rejimə qarşı qiyamda ittiham olunurlar.
Xatırladaq ki, sentyabrın 17-də İranda etiraz aksiyalarının başlanmasından indiyədək 20 minə yaxın etirazçı həbs olunub, 500-dən çox aksiyaçı hərbi-polis qüvvələri tərəfindən qətlə yetirilib. Qətlə yetirilənlərdən 68 nəfəri yeniyetmədir.
