“2022-ci ilin xarici ticarət üzrə yekunları göstərir ki, əsas ərzaq mal qrupları üzrə idxal ixracatı üstələməkdə davam edib. İdxalın xaricə göndərdiyimiz məhsullardan daha çox olması ölkədən valyutanın çıxması ilə yanaşı, istehlak bazarında qiymətlərə təsiri baxımdan da arzuolunan deyil. Məhz bu səbəbdən, 2022-ci ildə idxal inflyasiyası daha aktiv oldu”.
Globalinfo.az xəbər verir ki, bu sözləri millət vəkili iqtisadçı ekspert Vüqar Bayramov deyib.
Onun sözlərinə görə, Dövlət Statistika Komitəsi ötən il diri heyvanlar və heyvan mənşəli məhsullar üzrə idxalımızın 386 milyon 957 min dollar olduğu halda ixracatımızın 24 milyon 549 min dollar olduğunu açıqlayıb:
“Yəni ət məhsulları üzrə idxal ixracatı 16 dəfə üstələyib. Bitki mənşəli məhsullar üzrə idxalımız 968 milyon 758 min dollar, ixracatımız isə 695 milyon 75 min dollar olub. Bitki mənşəli məhsullar üzrə də idxalın 40.0 faizlik üstünlüyü var.
Vüqar Bayramov
Hazır qida məhsulları, alkoqollu və alkoqolsuz içkilər, sirkə, tütün və onun əvəzediciləri məhsullar üzrə idxalımız ötən il daha çox olub. Belə ki, 2022-ci ildə Azərbaycan bu kateqoriya üzrə 1 milyard 38 milyon dollar dəyərində məhsul idxal edib və 162 milyon 180 min dollarlıq ixrac reallaşdırıb. Göründüyü kimi, bu vacib mal qrupu üzrə də idxal yüksək olaraq qalmaqdadır.
Dünya və eləcə də regional ərzaq bazarlarındakı volatilliyi və bir sıra məhsullar üzrə qlobal ərzaq qıtlığını nəzərə alsaq idxalın minimumlaşdırılması daha vacib prioritet olaraq qalmaqdadır. 2022-2026-cı illəri əhatə edən İnkişaf Strategiyasında da yerli istehsalın dəstəklənməsi və ərzaq təhlükəsizliyi əsas milli prioritetlər sırasındadır. Bu idxal inflyasiyasının təsirlərinin minimumlaşdırılması və istehlak bazarında qiymətlərin optimallaşdırılması baxımdan da vacibdir”.
Turan Rzayev
Globalinfo.az
