“Demokratik ölkələrdə orduya mülki nəzarəti təmin etməyin ən yaxşı üsulu müdafiə nazirinin mülki şəxs olmasıdır. Baş Qərargah rəisinin hərbçi olması yetərlidir”.
Globalinfo.az xəbər verir ki, bu sözləri millət vəkili Qüdrət Həsənquliyev Moderator.az-a açıqlamasında deyib.
“Bundan başqa, Silahlı Qüvvələrə güclü parlament nəzarəti təmin edilməlidir. Bizdə “Silahlı Qüvvələr haqqında” Qanuna görə yalnız Ali Baş Komandanın belə bir səlahiyyəti var. Çox istərdim ki, müdafiə naziri mülki şəxs, Baş Qərargah rəisi isə Azərbaycan vətəndaşlığını qəbul etmiş general Bəxtiyar Ersay olsun. O özünü yaxşı mənada təsdiq etmiş generaldır, xalqımızın ona böyük etimadı var və orduda islahatları həyata keçirmək gücündədir. “Tərtər hadisələri” deyilən, orta əsrlərə xas qanlı cinayətlər və 44 günlük savaş ordumuzun rəhbərliyində ciddi struktur və kadr islahatlarının həyata keçirilməsini, əslində ordunun və məhkəmə sisteminin yenidən qurulmasını qaçılmaz etmişdir. Azərbaycanda ən müasir silahlarla təmin olunmuş, yüksək hazırlıqlı və təminatlı peşəkar ordu qurulmalıdır”, – deputat bildirib.
