Azərbaycan Respublikasının Ədliyyə Nazirliyi yenidən qeydiyyat üçün müraciət edən 27 siyasi partiyadan 8-ni artıq dövlət qeydiyyatına alıb.
Globalinfo.az modern.az-a istinadən rəsmi qeydiyyata alınan siyasi partiyaların siyahısını təqdim edir:
Yeni Azərbaycan Partiyası (YAP) – sədr İlham Əliyev;
Ağ Partiya – sədr Tural Abbaslı;
Vətəndaş Həmrəyliyi Partiyası – sədr Sabir Rüstəmxanlı;
Haqq Ədalət Partiyası – sədr Əli İnsanov;
Azərbaycan Milli İstiqlal Partiyası (AMİP) – sədr Arzuxan Əlizadə;
Ümid Partiyası – sədr İqbal Ağazadə;
Milli Dirçəliş Hərəkatı Partiyası – sədr Fərəc Quliyev;
Ana Vətən Partiyası – sədr Fəzail Ağamalı.
Xatırladaq ki, Azərbaycanda müstəqillik dövründə 66 siyasi partiya dövlət qeydiyyatına alınıb. Daha sonra onların sayı tədricən azalıb.
1993-cü ildə iki partiya ləğv edilib. 2021-ci ildə isə 6 partiya hakim YAP-a birləşdiyini elan edib.
Son vaxtlaradək ölkədə qeydiyyatda olan 58 siyasi partiya qalmışdı.
“Siyasi partiyalar haqqında” yeni qanun bu il qüvvəyə mindikdən sonra bu qurumların daha 31-i özlərinin ləğvi ilə bağlı Ədliyyə Nazirliyinə müraciət etdi. Bu, əsasən, yeni qanunla qeydiyyat üçün lazım olan minimum üzv sayının 5 minə qaldırılması ilə izah edildi.
Hazırda yenidən qeydiyyatdan keçmək üçün sənədlərini təqdim etmiş 19 siyasi partiya Ədliyyə Nazirliyindən cavab gözləyir.
