Böyük Britaniya və ABŞ 11 Rusiya vətəndaşına qarşı zərərli kompüter proqramları hazırladıqları və qazanc məqsədilə müxtəlif ölkələrdəki qurumları hədəfə aldıqları ittihamı ilə sanksiya tətbiq ediblər.
Globalinfo.az Oxu.az-a istinadən xəbər verir ki, bu barədə Böyük Britaniyanın Maliyyə Sanksiyalarının Tətbiqi Ofisi (OFSI) və ABŞ Maliyyə Nazirliyinin dərc etdiyi məlumatda deyilir.
Bildirilir ki, bu şəxslər xəstəxanalara və kritik infrastruktura, o cümlədən yerli hakimiyyət orqanlarına, şirkətlərə, məktəblərə və tibb müəssisələrinə kiberhücumların təşkilində iştirak ediblər.
Yenilənmiş sanksiya siyahısında 11 nəfərin şəxsi məlumatları ilə yanaşı, onların “Trickbot” və “Conti” kiberqruplarında yerinə yetirdikləri funksiyalar da yer alıb. Məlumata görə, sanksiyaya məruz qalan şəxslər dünya üzrə öz qurbanlarından ən azı 180 milyon dollar alıblar.
