BMT-nin Əfqanıstandakı Missiyasının rəhbəri Taliban administrasiyasının iqtisadiyyat naziri ilə görüşüb.
Globalinfo.az APA-ya xəbər verir ki, bu barədə BMT-nin Əfqanıstandakı Missiyası məlumat yayıb.
Bildirilib ki, görüş zamanı BMT rəsmisi Talibanın iqtisadiyyat nazirindən Əfqanıstanda QHT-lərin qadın işçilərinin fəaliyyətinə qoyulan qadağaya dair qərarı ləğv etməyi tələb edib.
“BMT-nin Əfqanıstandakı Missiyasının rəhbəri vəzifəsini icra edən Ramiz Ələkbərov bu gün Kabildə Talibanın iqtisadiyyat naziri Məhəmməd Həniflə görüşüb və görüşdə qadınların yerli və beynəlxalq QHT-lərin humanitar işlərində iştirakına qadağa qoyulması qərarını ləğv etməyə çağırıb.
Milyonlarla əfqanın humanitar yardıma ehtiyacı var və maneələrin aradan qaldırılması çox vacibdir”, – missiyanın yaydığı məlumatda qeyd olunub.
Xatırladaq ki, ötən həftə İqtisadiyyat Nazirliyi bütün yerli və xarici qeyri-hökumət təşkilatlarına növbəti bildirişə qədər qadın işçilərin çalışmasına icazə verməmək barədə göstəriş verib. Bu göstəriş birbaşa BMT-yə şamil edilmir, lakin onun bir çox proqramları bu qərara tabe olan QHT-lər tərəfindən həyata keçirilir.
