“İran xarici işlər naziri Hüseyn-Əmir Abdullahian və onun müavini Reza Nəcəfinin Azərbaycan səfəri xüsusi hadisə deyil”.
Bu sözləri Globalinfo.az-a politoloq Elxan Şahinoğlu İran xarici işlər naziri Hüseyn-Əmir Abdullahian və onun müavini Reza Nəcəfinin Azərbaycana səfərini şərh edərkən deyib.
O bildirib ki, iranlı nümayəndələr Qoşulmama Hərəkatına üzv ölkələrin nümayəndələrinin konfransında iştirak etmək üçün ölkəmizə səfər edir:
“Bundan xüsusi bir nəticə çıxartmaq çətindir. Çox təəssüf ki, İranın Azərbaycana yönəlik aqressiv siyasəti dəyişmir. Baxmayaraq ki, İran xarici işlər naziri azərbaycanlı həmkarı ilə tez-tez telefonla danışır, amma bu telefon danışığı münasibətlərin normallaşması üçün kifayət deyil.
Elxan Şahinoğlu
İranda bütün bu məsələlərlə bağlı qərarı verən başqalarıdır. Onlar isə Azərbaycana düşmən kimi baxırlar, münasibətlərin normallaşmasını istəmirlər. İran hakimiyyəti düşünür ki, Azərbaycanın daxili işlərinə qarışa bilər. Amma bu düşüncə yalnız rəsmi Tehrana problem yaradır.
Mümkündür ki, Abdullahian Qoşulmama Hərəkatına üzv ölkələrin nümayəndələrinin konfransında iştirakdan sonra əlavə görüş keçirə bilər. Lakin bu görüş münasibətlərin normallaşması üçün kifayət deyil”.
Turan Rzayev
Globalinfo.az
