Qarabağdakı keçmiş qondarma rejimin “prezidentləri”nin saxlanılma prosesi ilə bağlı yeni iddialar ortaya atılıb.
Globalinfo.az xəbər verir ki, erməni jurnalist Tatul Hakopyan bu məsələni araşdırdığını və şok detalların üzə çıxdığını bildirib.
Hakopyan “keçmiş prezidentlər” Bako Saakyan, Arkadi Qukasyan və digər separatçı Davit İşxanyanın xəyanətə uğradıqlarını deyib:
“Qukasyan və Saakyan bir neçə həftə öncə sülhməramlıların vertolyotunda Xankəndidən Sisiana qaçmağa çalışıblar. Davit İşxanyan da onlarla olub. Lakin Xankəndi hava limanında bütün uçuşlara Azərbaycan xüsusi xidmət orqanları nəzarət etdiyi üçün bu planı həyata keçirməyi bacarmayıblar. Daha sonra Qarabağda rusların aviabazasında gizləniblər. Onlar inanırdılar ki, əvvəl-axır Xankəndidən Ermənistana, ya da Rusiyaya vertolyot uçacaq, beləliklə qaça biləcəklər. İrəvan onlara dəfələrlə Azərbaycanla danışıqlar aparmağı təklif etdi, lakin qulaq asmadılar. Onlar daha sonra aviabazadan çıxaraq keçmiş “daxili işlər naziri” Karen Sərkisyanın Xankəndidəki evinə gediblər və orada saxlanılıblar”.
Erməni jurnalist digər terrorçu lider Araik Arutyunyanın da qaçmaq istədiyini bildirib:
“Bütün bunlar baş verərkən Araik Arutyunyan Xankəndidə səhmlərinin bir hissəsi ona aid olan konyak zavodunda gizlənib. Əldə etdiyimiz məlumata görə, saxlanılmazdan əvvəl Azərbaycan tərəfi ilə əlaqə saxlamaq və qaçmasının əvəzində müəyyən təkliflər vermək istəyib. Lakin Azərbaycan xüsusi xidmət orqanları onun gizləndiyi yeri aşkar edərək əməliyyat nəticəsində saxlayıb, daha sonra Bakıya aparıblar”.
Ayşən Mustafa
Globalinfo.az
