“ABŞ terror aktı təhlükəsi barədə Rusiyaya aydın və ətraflı məlumat verib”.
Globalinfo.az xəbər verir ki, bu barədə Ağ Evin Milli Təhlükəsizlik Şurasının strateji kommunikasiyalar üzrə koordinatoru Con Kirbi deyib.
O bildirib ki, Birləşmiş Ştatlar bu terror aktının qarşısını almaq üçün Rusiyaya kömək etməyə çalışıb.
“Martın 7-də Moskva vaxtı ilə saat 11:15-də ABŞ hökuməti prosedurlara uyğun olaraq əvvəllər dəfələrlə istifadə edilən kanallar vasitəsilə Rusiya təhlükəsizlik xidmətinə yazılı xəbərdarlıq göndərib. Bundan əlavə, martın 8-də biz Amerika vətəndaşlarını Moskvada böyük toplantı olan mərkəzlərə və konsert salonlarına getməməyi tövsiyə etmişik”, – Kirbi bildirib.
Onun sözlərinə görə, ABŞ öhdəliklərinə ciddi yanaşdığı üçün bu məlumatları Rusiyaya ötürüb.
“Biz heç vaxt terror hücumlarında günahsız insanların ölümünü görmək istəməmişik. Bu, ABŞ-ın 2023-cü ilin sentyabrından bəri Rusiyaya göndərdiyi çoxsaylı xəbərdarlıqlarından biridir. Rusiya hökumətinə və ictimaiyyətinə etdiyimiz xəbərdarlıqda bu hücumun tam məsuliyyətini İŞİD-in daşıdığını açıqladıq. Birləşmiş Ştatlar bundan sonra da terror təhlükəsi barədə bütün dünya hökumətlərini xəbərdar edəcək. Baxmayaraq ki, Rusiya tərəfi günahı Ukrayna və ABŞ-ın üzərinə atmağa çalışır”, – deyə Kirbi vurğulayıb.
Əliyar Xəlil
Globalinfo.az