“Rusiya Azərbaycanla bağlı məsələləri qarşılıqlı hörmət əsasında həll etməkdə qərarlıdır”.
Globalinfo.az xəbər verir ki, Rusiya Xarici İşlər Nazirliyinin mətbuat katibi Mariya Zaxarova deyib.
O, Azərbaycan Prezidenti İlham Əliyevin 9 May – Faşizm üzərində Qələbə münasibətilə Moskvada keçirilən hərbi parad və tədbirlərə qatılmaması ilə bağlı jurnalistlərin suallarını cavablandırıb.
XİN rəsmisi iki ölkə arasında müşahidə olunan gərginliyə münasibət bildirib:
“Moskva Bakı ilə münasibətləri 2022-ci ildə imzalanmış “Müttəfiqlərin qarşılıqlı fəaliyyəti haqqında” bəyannamənin əsasında qurur. Rusiya bu sənədin bütün potensialını üzə çıxarmaq və yaranan bütün məsələləri qarşılıqlı fayda və hörmət əsasında həll etmək əzmindədir.
Siz sanki Azərbaycan nümayəndə heyətinin Moskvaya gələrək bu bayramı bizimlə bölüşməsini, tədbirdə parlaq şəkildə iştirak etməsini və həmçinin keçmiş SSRİ-nin müxtəlif respublikalarında, o cümlədən etnik azərbaycanlı kimi Qızıl Ordunun sıralarında xidmət etmiş veteranların xatirəsini yad etməsini görmürsünüz. Niyə buna diqqət etmirsiniz? Görünəni görməmək düzgün deyil, ədalətsizlik və təhlükəlidir. Liderlərin qrafikinə gəlincə, bu barədə Rusiya Prezident Administrasiyası açıqlama verib”, – deyə M.Zaxarova əlavə edib.
Qeyd edək ki, AZAL-ın sərnişin təyyarəsinin qəzaya uğramasından 5 ay keçsə də, Rusiya tərəfindən hər hansı əməliyyat istintaq tədbirləri aparılmayıb, eləcə də bu hadisədə günahı olanlar tapılaraq məsuliyyətə cəlb olunmayıb.
Eyni zamanda, bir müddət əvvəl Azərbaycanın bir sıra media resurslarına kiberhücumların Rusiyadan edildiyi təsdiqini tapıb. Moskva bu məsələyə də aydınlıq gətirməyib.
Bundan başqa, bir neçə gün əvvəl Azərbaycan parlamentinin üzvü Azər Badamovun Rusiyaya girişinə qadağa qoyulub, o, Moskvada aeroportda saxlanılaraq, deportasiya edilib. Rusiya tərəfi isə məsələ ilə bağlı əsaslandırılmış hər hansı açıqlama verilməyib.
Bütün bu amillərin Azərbaycan Prezidentinin Moskvaya səfərinin təxirə salınmasına təsir göstərdiyi bildirilir.
Ayşən Mustafa
Globalinfo.az
