Qazaxıstanın Ulıtau vilayətində mədənin çökməsi nəticəsində ölən yeddinci mədənçinin meyiti xilasetmə qrupları tərəfindən tapılıb.
Globalinfo.az “Report”a istinadən xəbər verir ki, bu barədə Qazaxıstan FHN məlumat yayıb.
“Qazaxmıs” MMC-yə məxsus mədəndə aparılan axtarış-xilasetmə işləri zamanı yeddinci əməkdaşın meyiti tapılıb. Onun kimliyi müəyyənləşdirilir. Yeddi işçinin hamısının meyitləri səthə qaldırılıb və məhkəmə-tibbi ekspertiza üçün polis əməkdaşlarına təhvil verilib”, – məlumatda qeyd olunub.
Xatırladaq ki, fevralın 17-də respublikanın Ulıtau vilayətindəki “Jomart” mədənində dağ kütləsinin uçması nəticəsində yeddi işçi uçqun altında qalmış, onlarla əlaqə kəsilmişdi. Daha sonra xilasetmə qrupları uçqun yerində altı meyit aşkar etmişdilər.
Qazaxıstan hökuməti olayın səbəblərini araşdırmaq üçün Baş nazirin müavini Kanat Bozumbayevin rəhbərliyi ilə xüsusi komissiyanın yaradıldığını bildirib.
***00:47
Qazaxıstanın Ulıtau vilayətinin Janaarka rayonunda yerləşən “Jomart” mədənində süxur kütləsinin uçması baş verib.
Globalinfo.az Qazaxıstan FHN-in mətbuat xidmətinə istinadən xəbər verir ki, hadisə nəticəsində 7 şaxtaçı dağıntılar altında qalıb. Kabel qırıldığı üçün işçilərlə əlaqə kəsilib.
Hazırda hadisə yerində xilasetmə işləri aparılır. Hadisənin səbəbləri araşdırılır.
