ABŞ Prezidenti Donald Trampın İrana göndərilən silahları kürdlərin götürdüyünə dair açıqlaması mübahisə doğurub.
Globalinfo.az xəbər verir ki, İrandakı kürd qruplaşmaları Trampın iddiasını təkzib ediblər.
Kürdüstan Azad Həyat Partiyasının (PJAK) silahlı qanadının yüksək vəzifəli fiquru Siamand Moeini deyib ki, qruplaşma heç bir silah-sursat almayıb. “Digərlərinə gəldikdə isə, cavab verə bilmərəm”, – Moeini bildirib.
Kürdüstan Azadlıq Partiyasının (PAK) beynəlxalq əlaqələr üzrə koordinatoru Hana Yazdanpanah təşkilatın silah ehtiyatının əsasən əvvəlki dövrlərdən qaldığını söyləyib.
“Bizim ixtiyarımızda İŞİD-lə beş il davam edən mübarizədən qalan köhnə Kalaşnikov tüfəngləri, eləcə də həmin dövrdən əldə edilmiş digər silahlar var. İndiyədək ABŞ-dan heç bir silah almamışıq”.
Şimali İraqda fəaliyyət göstərən İran Kürdüstan Demokrat Partiyası (KDP) isə Rojalata (İran Kürdüstanı) silah ötürülməsi və ya tədarükü ilə bağlı iddiaları rədd edir.
“Silahların İraq sərhədindən keçirilməsi ciddi hüquqi nəticələr doğura bilər. Üstəlik, silahlı şəxslərin aksiyalara qoşulması onların mahiyyətini dəyişir — bu artıq etiraz deyil, müharibə kimi qiymətləndirilə bilər”, – deyə, KDP baş katibinin müavini Mustafa Mövludi qeyd edib.
Safura Bənnayeva
Globalinfo.az
Həmçinin oxuyun
