Ermənistan 2030-cu ilə qədər Türkiyə və Azərbaycanla sərhədlərin və nəqliyyat kommunikasiyalarının açılacağına ümid edir, bu isə Cənubi Qafqazı Avropa və Mərkəzi Asiya arasında əsas əlaqələndirici həlqəyə çevirməyə imkan verəcək.
Globalinfo.az bildirir ki, “Report”un Avropa bürosunun məlumatına görə, bunu Ermənistan xarici işlər nazirinin müavini Vahan Kostanyan bildirib.
Onun sözlərinə görə, İrəvan regional nəqliyyat layihələri üzərində işi davam etdirirdiyi və qonşu ölkələr tərəfindən daha çox şəffaflıq əlamətləri gördüyü üçün kommunikasiyaların açılması daha tez də baş verə bilər.
“Bizim baxışımız bundan ibarətdir ki, 2030-cu ilə qədər təəssüf ki, sərhədlərin indiyədək bağlı olduğu iki qonşumuzla – Türkiyə və Azərbaycanla açıq kommunikasiyalarımız və açıq sərhədlərimiz olacaq”, – Kostanyan bildirib.
O bildirib ki, Ermənistan amerikalı tərəfdaşları ilə birlikdə “Tramp Marşrutu” (TRIPP) layihəsinin işə salınması üçün hüquqi hazırlıqları yekunlaşdırır. Bu layihə Cənubi Qafqazın nəqliyyat xəritəsini dəyişdirməyə və Avropa ilə Mərkəzi Asiya arasında əlaqələri genişləndirməyə qadirdir. Eyni zamanda layihənin ilk növbədə dəmir yolu komponentinə yönəlmiş texniki-iqtisadi əsaslandırması hazırlanır.
Nazir müavininin sözlərinə görə, Ermənistan həmçinin gələcəkdə tranzit daşımalarının artırılması üçün nəqliyyat infrastrukturunun modernləşdirilməsi, o cümlədən yeni sərhəd-keçid məntəqələrinin tikintisi və avtomobil yollarının inkişafı məsələlərində Avropa İttifaqı ilə əməkdaşlıq edir.
Kostanyan qeyd edib ki, ənənəvi ticarət marşrutlarının qeyri-sabitliyi və qlobal logistika zəncirlərində yaranan fasilələr Orta Dəhlizin əhəmiyyətini artırır və region dövlətləri üçün yeni imkanlar yaradır.
O, Azərbaycanın Ermənistan yükləri üçün dəmir yolu əlaqəsini açmağa hazır olduğuna dair bəyanatlarına, eləcə də Ermənistan mallarının Türkiyə ərazisi vasitəsilə tranziti mümkünlüyü barədə son zamanlar Türkiyə tərəfindən daxil olan siqnallara diqqət çəkib.
Kostanyanın sözlərinə görə, nəqliyyat əlaqələrinin inkişafı təkcə ticarətin artımına kömək etmir, həm də region ölkələri arasında iqtisadi qarşılıqlı asılılığın artması hesabına Cənubi Qafqazda sabitliyi möhkəmləndirir.
Xarici işlər nazirinin müavini əlavə edib ki, Ermənistan həmçinin Orta Dəhlizin ona aid hissəsindən yüklərin maneəsiz hərəkətini təmin etmək niyyətindədir ki, bu da Aİ-nin dəstəyi ilə rəqəmsal həllərin və hüquqi bazanın daha da inkişaf etdirilməsini tələb edəcək.
Həmçinin oxuyun
