Bakıda Beynəlxalq İslam Ticarətin Maliyyələşdirilməsi Korporasiyası (ITFC) ilə yeni 3 milyard ABŞ dolları dəyərində sazişlər imzalanıb.
Globalinfo.az “Report”a istinadən xəbər verir ki, bunu ITFC-nin Baş İcraçı direktoru Adeeb Alaama Bakıda keçirilən İslam İnkişaf Bankı (IsDB) Qrupunun 51-ci İllik Toplantıları çərçivəsində keçirilən mətbuat konfransında bildirib.
O, Azərbaycan hökumətinə göstərilən yüksək qonaqpərvərliyə və bu mühüm iclaslara ev sahibliyinə, eləcə də regional əməkdaşlıq, iqtisadi diversifikasiya və özəl sektorun inkişafına davamlı sadiqliyinə görə minnətdarlığını ifadə edib.
A.Alaama bildirib ki, artan qeyri-müəyyənlik və mürəkkəbliklə xarakterizə olunan bugünkü qlobal iqtisadi mühitdə ticarət dayanıqlılığın, iqtisadi artımın və yeni imkanların əsas hərəkətverici qüvvələrindən biri olaraq qalır: “ITFC-də biz ticarəti davamlı inkişaf üçün mühüm katalizator kimi qiymətləndiririk. Ticarət zəruri əmtəələrin təmin olunmasına, bizneslərin dəstəklənməsinə və üzv ölkələrimizdə iqtisadi imkanların genişləndirilməsinə xidmət edir. 2025-ci ildə ITFC ticarətin maliyyələşdirilməsi üzrə 9,3 milyard ABŞ dolları həcmində təsdiqlənmiş əməliyyatlar həyata keçirib ki, bu da indiyədək ən yüksək illik göstəricidir. Bu həftə Bakıda keçirilən tədbirlər çərçivəsində ITFC ümumilikdə təxminən 3 milyard dollar dəyərində yeni müqavilələr imzalayıb. Bu müqavilələr bir sıra üzv ölkələrlə yeni çərçivə sazişlərini əhatə edir və həm ticarətin maliyyələşdirilməsi, həm də ticarətin inkişafı sahələrində gələcək əməkdaşlıq üçün möhkəm baza yaradır”.
Onun sözlərinə görə, imzalanmış sənədlər regiondakı tərəfdaş maliyyə institutları ilə ticarətin maliyyələşdirilməsi mexanizmlərini də əhatə edir və bu, özəl sektorun, xüsusilə kiçik və orta müəssisələrin (KOM-ların) maliyyə resurslarına çıxışının genişləndirilməsinə xidmət edir: ITFC həmçinin ortaq üzv ölkələrdə ticarətin maliyyələşdirilməsini genişləndirmək məqsədilə Beynəlxalq Maliyyə Korporasiyası (IFC) ilə strateji əməkdaşlıq sazişi imzalayıb. Bu tərəfdaşlıqlar ITFC-nin ticarətin gücləndirilməsinə, özəl sektorun inkişafına və üzv ölkələrdə dayanıqlı iqtisadi artımın təşviqinə sadiqliyini daha da möhkəmləndirir. Bu rəqəmlərin arxasında real inkişaf nəticələri dayanır: Bura ərzaq təhlükəsizliyinin yaxşılaşdırılması, enerji təchizatının daha etibarlı təmin edilməsi, yeni iş yerlərinin yaradılması və sahibkarlar üçün daha geniş inkişaf imkanlarının formalaşdırılması daxildir”.
A. Alaama qeyd edib ki, Azərbaycannda ITFC bu əməkdaşlığı daha da gücləndirib: “Hədəflənmiş ticarətin maliyyələşdirilməsi mexanizmləri vasitəsilə maliyyə institutları və özəl sektorun dəstəklənməsi çərçivəsində biz ölkədə KOM-ların İslam ticarət maliyyəsinə çıxışını genişləndirmək məqsədilə “Rabitəbank” və “Turanbank” ilə tərəfdaşlıq qurmuşuq. ITFC həmçinin ticarətin asanlaşdırılması və potensialın artırılmasına yönəlmiş ticarətin inkişafı təşəbbüslərini davam etdirir. Bu təşəbbüslərdən biri “Trade Connect Central Asia Plus” (TCCA+) layihəsidir ki, bu da Mərkəzi Asiya ölkələri və Azərbaycanın qarşılıqlı ticarətini, eləcə də onların digər regionlarla ticarət əlaqələrini dəstəkləməyi hədəfləyir. 2025-ci il həmçinin ITFC-nin əvvəlki beşillik korporativ strategiyasının uğurla başa çatmasını və İslam İnkişaf Bankı Qrupunun 10 illik strateji çərçivəsinə uyğunlaşdırılmış yeni mərhələnin başlanmasını qeyd edir”.
O deyib ki, gələcəkdə diqqət özəl sektor və KOM-lara dəstəyin genişləndirilməsinə, səhiyyə, aqrar-ərzaq və rəqəmsal ticarət kimi sektorlarda iştirakın artırılmasına, eləcə də rəqabətqabiliyyətliliyi, əlaqəliliyi və iqtisadi dayanıqlığı gücləndirən inteqrasiya olunmuş ticarət həllərinin təqdim edilməsinə yönələcək: “Qlobal ticarət dəyişməkdə və inkişaf etməkdə davam etdiyi bir şəraitdə ITFC qarşısında duran çağırışlara baxmayaraq, ticarətin xidmət göstərdiyimiz icmalar üçün inklüziv inkişafın əsas hərəkətverici qüvvəsi olaraq qalmasını təmin etməyə sadiqdir”.
Həmçinin oxuyun
