Kiprin Pila kəndi yaxınlığında yerləşən BMT-yə məxsus bufer zonasında gərginlik artıb. Hadisə adadakı yunan və türk icmalarının ziddiyyətli açıqlamalarına səbəb olub.
Globalinfo.az xəbər verir ki, Yunan tərəfi Türkiyənin bölgəyə 15 tank göndərdiyini, mülki geyimdə polis əməkdaşlarının yerləşdirildiyini və Şimali Kipr Türk Respublikası bayrağının qaldırıldığını iddia edir.
Lakin BMT sülhməramlı missiyası bu məlumatları təkzib edib. Bildirilib ki, texnika və qüvvələr bufer zonaya daxil olmayıb, yalnız türk tərəfinin nəzarətində olan ərazidə yerləşdirilib.
Türk tərəfi isə hadisənin hərbi deyil, təsərrüfat mübahisəsi ilə bağlı olduğunu açıqlayır. Onların sözlərinə görə, yunan tərəfi heyvan xəstəliyi ilə əlaqədar yoxlama aparmaq üçün sərhədi keçmək istəyib, lakin buna icazə verilməyib.
Bölgədə BMT və Britaniya qüvvələrinin patrulları gücləndirilib. Vəziyyət hazırda sabitdir, lakin tərəflər arasında gərginlik qalmaqdadır.
Qeyd edək ki, Türkiyə Xarici İşlər Nazirliyindəki diplomatik mənbələr haqqin.az-a tankların bufer zonasına daxil olması ilə bağlı məlumatları təkzib edib.
Hazırda vəziyyət sabit olaraq qalır, baxmayaraq ki, sülhməramlıların və Britaniya qoşunlarının sayının artması tərəflər arasında davamlı yüksək səviyyədə inamsızlığın olduğunu göstərir. Bufer zonasında (“Yaşıl Xətt”) mümkün təxribatların qarşısını almaq üçün BMT qüvvələri patrul xidməti həyata keçirir.
Əliyar Xəlil
Həmçinin oxuyun
