Füzuli Şəhəri Günü təntənəli şəkildə qeyd olunub.
Bu barədə Globalinfo.az-a Mədəniyyət Nazirliyindən məlumat verilib.
Bildirilib ki, Prezident İlham Əliyevin 31 iyul 2023-cü il tarixdə imzaladığı sərəncamla Azərbaycan Respublikasının işğaldan azad edilmiş əraziləri üzrə şəhər günləri təsis edilib.
Sərəncama əsasən, 17 oktyabr Füzuli Şəhəri Günüdür. Bu münasibətlə Heydər Əliyev Fondu, Mədəniyyət Nazirliyi və Azərbaycan Respublikası Prezidentinin Qarabağ iqtisadi rayonunda xüsusi nümayəndəliyinin birgə təşkilatçılığı ilə oktyabrın 17-də Füzulidə təntənəli şəhər günü tədbiri keçirilib.
Tədbirdə dövlət və hökumət rəsmiləri, millət vəkilləri, diplomatik korpusun nümayəndələri və digər qonaqlar iştirak ediblər.
Azərbaycan Respublikasının Prezidenti İlham Əliyev Füzuli Şəhəri Günündə bu ilin
avqustundan doğma yurdlarına qayıtmış bir qrup Füzuli sakini ilə görüşüb səmimi söhbət edib.
Sonra Füzuli Şəhəri Gününün geniş qala-konserti təqdim edilib. Tanınmış incəsənət ustalarının ifasında xalq və bəstəkar mahnıları səsləndirilib.
Dahi Azərbaycan şairi Məhəmməd Füzuliyə həsr olunmuş “Vətənimdir, vətənimdir, vətənimdir, vətənim!”, “Ümummilli lider Heydər Əliyev və Füzuli”, “Füzuli rayonu – işğaldan öncə və işğaldan sonra” adlı, həmçinin Füzuli ərazisindəki Yedditəpə kurqanları arxeoloji abidəsindən aşkar edilmiş maddi mədəniyyət nümunələrinin yer aldığı sərgilərlə tanışlıq olub.
Daha sonra qonaqlar “Füzuli” guşəsinə baş çəkiblər. Burada Məhəmməd Füzulinin müxtəlif əsərləri əsasında hazırlanmış kompozisiyalar nümayiş olunub, şairin şeirləri səsləndirilib. Rəssam tərəfindən dahi şairin portreti yaradılıb.
Tədbir məkanında “100 tar” adlı kompozisiya təqdim olunub. Ustad tarzənlər, uşaq, yeniyetmə və gənclərdən ibarət 100 nəfər tarzənin ifası maraqla qarşılanıb.
Sonra tədbir iştirakçıları və qonaqlar Azərbaycan milli mətbəx nümunələrini dadıblar.
***12:25
Bu gün Füzuli Şəhəri Günüdür. Bu münasibətlə Füzuli şəhərində ilk dəfədir ki, Şəhər Günü qeyd edilir.
Globalinfo.az AZƏRTAC-a istinadən xəbər verir ki, Şəhər Günü bayram tədbirində deputatlar, xarici ölkələrin diplomatları, Füzuli sakinləri, şəhid ailələri, qazilər və veteranlar, ictimaiyyət nümayəndələri iştirak edirlər.
Ölkəmizin tanınmış incəsənət nümayəndələri konsert proqramı ilə çıxış edirlər.
Qeyd edək ki, Füzuli Şəhəri Gününün təsis olunması Füzuli şəhərinin Ermənistan silahlı qüvvələrinin işğalından azad edilməsi tarixi ilə bağlıdır. Oktyabrın 17-də şəhərin erməni işğalçılarından təmizlənməsindən 3 il ötür.
Prezident İlham Əliyevin bu il iyulun 31-də imzaladığı Sərəncama əsasən, hər il oktyabrın 17-də Füzuli Şəhəri Günü təntənəli şəkildə qeyd ediləcək.
Füzuli rayonunda bərpa və yenidənqurma işləri sürətlə davam etdirilir. Şəhər ərazisində infrastruktur bərpa olunur, yaşayış binaları tikilir, kəndlər yenidən qurulur, həmçinin beynəlxalq hava limanı açılıb. Artıq Böyük Qayıdış proqramı çərçivəsində Füzuli şəhərinin sakinlərinin bir qrupunun qayıdışı təmin edilib.
***11:47
Mədəniyyət Nazirliyi, Heydər Əliyev Fondu və Azərbaycan Respublikasının Prezidentinin Qarabağ iqtisadi rayonundakı işğaldan azad edilmiş ərazilərdə xüsusi nümayəndəliyinin birgə təşkilatçılığı ilə Füzuli Şəhəri Günü keçirilir.
Globalinfo.az APA-ya istinadən xəbər verir ki, tədbirdə Qarabağ iqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Azərbaycan Respublikası Prezidentinin xüsusi nümayəndəsi Emin Hüseynov və mədəniyyət naziri Adil Kərimli ilə yanaşı, bir sıra dövlət və ictimai xadimlər, mədəniyyət nümayəndələri və media mənsubları iştirak edir.
Füzulidən olan Vətən Müharibəsi qazisi Şövlət İsazadə saytımıza təəssüratlarını bölüşüb. O, döyüşün ilk günlərindən ön cəbhədə xidmət etdiyini və Füzulinin azad olunması əməliyyatında iştirakından bəhs edib:
“Döyüş şücaətimiz Cənab Ali Baş Komandan tərəfindən yüksək qiymətləndirilib və medallarla təltif edilmişik. Bugünkü gündə isə azad olunmuş ərazilərdə bu cür bayram ab-havasının yaşanması, hesab edirəm ki, şəhidlərimizin ruhunu şad edir. Allah hər zaman Ordumuzu, dövlət rəhbərimizi və bu milləti qorusun”.
Nəriman Əliyev isə həm birinci, həm də ikinci Qarabağ müharibəsinin iştirakçısıdır.
Vətən müharibəsi qazisi saytımıza açıqlamasında 2020-ci ilin oktyabrında məhz bu ərazilərin azad olunması əməliyyatında iştirakından danışıb: “Şükürlər olsun ki, artıq Azərbaycanın suverenliyi tamamilə bərpa edilib. Bu, ordumuzun, onun Ali Baş Komandanının və bu millətin gücünün göstəricisidir”.
Qeyd edək ki, gün ərzində proqram çərçivəsində 8 guşədən ibarət “Füzuli hücrələri” adlı bədii kompozisiyanın, həmçinin Ümummili Lider Heydər Əliyevə, Məhəmməd Füzuliyə, “Yedditəpə kurqanlar” abidəsinə, “Azərxalça”ya aid sərgilərin nümayişi nəzərdə tutulub.
Sərgilərin ardından Qala konsert proqramı və atəşfəşanlıqla tədbirə yekun vurulacaq.
